جمال مبارك
كنت عند حسن ظني و ركبت الطيارة و روحت حتي لو ماكنتش روحت على أول طيارة و كنت عايز تبقي رئيس مصر كنت لازم تفضل في الخرطوم لحد ما آخر مواطن يغادر الخرطوم
[اجابتي على سؤال د.أنس خالد }
علاء مبارك
أول مكالمة ليك عبرت عن شعورك كمواطن عادي يشعر بالغضب ...تاني مكالمة ليك اندهشت منها ....تالت مكالمة توجست منك خيفة ...و الفار ابتدي يلعب في عبي ...
سفير مصر في الجزائر و في السودان
هو حضراتكم هناك بتعملوا إيه بالظبط
السادة القومجية العرب
١- صدام حسين بطل الأمة ليه
ا- لأنه حرر القدس و فلسطين
ب- لأنه إحتل الكويت العربية المسلمة
ج- لأنه أول و أخر حاكم ديمقراطي للعراق
د - لأن الأمريكان شنقوه
للقاريء إن يضيف ما يشاء من أسباب
الأصدقاء التوانسة اللي بيهاجموا الرئيس المصري و نظامه و طبعاً عندهم حق ...ليه ما بيهاجموش الرئيس زين العابدين بن علي ؟
١ - لأن زين العابدين ايده طرشة و ما بيعرفش أبوه
٢ - لأن زين العابدين حتة سكرة
٣ - لأن ما فيش حد هناك إسمه زين العابدين بن علي
إشرح مع الإضافة
ليه لما حصلت الأزمة مع الجزائر تم ذكر موقف هواري بومدين و لما حصلت أزمة بينا و بين السعودية أو الأمارات ما حدش جاب سيرة موقف المغفور له الملك فيصل و المغفور له الشيخ زايد ال نهيان مع إن الاتنين دول كانت مساهمتهم أكبر مساهمة في الحرب ....مجرد سؤال
التوريث
مصر نجل الرئيس عايز يورث الرئاسة
ليبيا نفس الموضوع
اليمن نفس الموضوع
تونس بيتم إعداد زوج إبنة الرئيس لتولي السلطة
الجزائر بيتم إعداد شقيق الرئيس
سوريا تم و اللي كان كان
ليه القومجية العرب من الدول بعاليه مهتمين بموضوع التوريث في مصر و بيعيرونا بيه و ما حدش فيهم بيفتح بقه في الخيبة التقيلة اللي عندهم ؟....حاجة محيراني بجد
لو اخترت إسم للحزب الوطني الديمقراطي هايكون إيه
١ - الحزن الوطني
٢ - الحزب الوثني الأنفلاتي
٣ - هو حزب لكن حزب واطي
يسمح بالإضافة بدون حد أقصي
ليه ما حدش بيتكلم عن المواضيع الأتية
١- أثناء الحرب العراقية الإيرانية كان نظام ليبيا القومي المسلم بيبعت صواريخ سكود لنظام البعث السوري المسلم اللي كان بيسلمها للجمهورية الإسلامية الإيرانية عشان يضربوا بيها بغداد العربية المسلمة
٢ - في ١٩٦٣ قامت حرب الحدود بين الجزائر و المغرب .....هو ما كنش فيه قومية عربية و إسلام أيامها ؟
٣ - العراق لما إحتل الكويت ؟
كانت فين القومية و الإسلام ساعتها ؟
٤ - قوات الإحتلال الأمريكية و البريطانية دخلت من الحدود البرية و البحرية لقطر و الكويت ....السؤال هنا ليه بيلوموا مصر على إحتلال العراق ؟
أذكر مساهمات الدول الأتية في الحروب مع إسرائيل علي أي جبهة كانت
١ - قطر
٢ - البحرين
٣ - تونس
٤ - سلطنة عمان
٥ - اليمن
٦ - ليبيا
و لو ماطلعش ليهم مساهمات ليه بقي فيه كتير منهم مصدعين راسنا؟
إشرح ذلك لو سمحت
ليه القومجية شايفين السفارة الإسرائيلية في مصر و مش شايفين نفس السفارة في الأردن ؟
١- عشان الأردن مش دولة عربية و لا إسلامية
٢ - عشان ما فيش سفارة هناك
٣- عشان هما ماعندهمش نظر أساساً
كتير من الناس علقت علي زيارة شيمون بيريز للقاهرة بس كلهم بلعوا لسانهم لما تسيبي ليفني راحت طنجة عشان
١- طنجة دي في إسرائيل
٢ - المغرب دولة أوروبية فعادي يعني
٣ - لأن الست ليفني كانت رايحة تجيب بخور و راجعة على طول
لو عندك أسباب تانية نرجو الإفادة
القومجية بيقولوا إن مصر باعت عروبتها ...أجب عن الأسئلة الأتيه
١ - باعتها لمين ؟
٢- باعتها بكام؟
٣ - مين الحمار اللي اشتري ؟
ليه فيه ناس بتزعل لما المصري يقول مصري و افتخر و ماحدش بيزعل من الإماراتي لما يقول اماراتي و افتخر و عاملين حملة إعلامية عشان كده ؟
١- الكلام ده حلال في الإمارات
٢ - لكن نفس الكلام حرام في مصر
٣ - لا أعرف
ليه فيه أطراف كتيرة عرضت الوساطة بين مصر و الجزائر على أساس انهم عرب و مسلمين و ماحدش عرض يتوسط بين فتح و حماس ؟
١ - عشان فتح و حماس عيال وحشين
٢ - عشان لا هم عرب و لا مسلمين
٣ - أصلهم إتخانقوا و هم بيلعبوا استغماية و بكرة يتصالحوا لوحدهم
القومجية و الأصدقاء العرب اللي عايزين المصريين هم اللي يحاربوا إسرائيل و هم قاعدين ...الأسباب
١- ان المصريين هم بس اللي كتب عليهم القتال
٢ - لأنهم مش فاضيين بيتفرجوا على قناة الجزيرة
٣- لأن الحرب مافيهاش تكييف
٤- لأسباب أخري
نكمل بقي بعدين لما نعرف الأجوبة .....
ليست هناك تعليقات:
إرسال تعليق