الواد انتيكا طول عمره انتيكا....سموه انتيكا من صغره ..المدرس يسأله مين اللي أسس الدولة العثمانية ؟ يرد و يقول له عثمان أحمد عثمان
و لما سأله إيه أهم أثار الأتراك في مصر ؟ رد بسرعة الجبنة التركي يا أستاذ
المدرس جاله حالة ذهول و قال له إنت يا واد يا انتيكا بتجيب المعلومات دي منين ؟
الواد نفخ صدره و قال له أصلي بحب أقرا في التاريخ و البولوتيكا و من يومها بقي إسمه انتيكا ...
و انتيكا كبر و بقي انتيكا أصلي مش تقليد و بيفهم في كل حاجة في أي حاجة ...
جاله تعيين في جريدة حكومية ...دخل على رئيس التحرير و قاله يا ريت يا أستاذ تسمح لي اني اكتب مقالات ..
بص له الراجل من فوق لتحت و قال له و إنت بقي بتكتب إيه يا انتيكا ؟
قال له بكتب في كل حاجة و في أي حاجة ...أصلي أنا خدام لقمة العيش الطرية يا فندم ...
و باستخدم منهج خالتي ستوتة العامشة في التحليل البولوتيكي الميتافيزيقي و هاعجبك أوي أوي ....
الراجل قال له تعجبني ..ابتدي يا انتيكا و فهم الناس أصول البولوتيكا..
الواد انتيكا ابتدي يكتب عن الليبرالية لما تتحط مع التقلية جوة الملوخية و كتب كمان عن سر الحبهان في سياسة إيران ...
و كل ما الناس تشتمه أكتر يفرح أوي أوي و يقول أنا على الطريق الصحيح
و بقي يطلع في التليفزيون يشرح نظريته اللولبية في الأزمة العربية ...
لكن ماحدش عارف الواد انتيكا بيعمل كدة ليه ...الحقيقة إن انتيكا و هو صغير كان عيل مكعبر و ما فيش بنت بتعبره و الموضوع ده عمل له ترسبات في مجاري مخه و السبب التاني إنه نفسه و مني عينه إنه يبقى مشهور ..
و هو بيكتب دايماً بيفتكر لما راح لأبوه بعد ما العيال في المدرسة لزقوه على قفاه كالعادة قدام البنات ..راح قال لأبوه أنا نفسي أبقي مشهور
قال له و لا يهمك أنا هاعلمك الخيابة يا بني لازم تيجي في الهايفه و تتصدر و إنت هتبقي مشهور و المزز يترموا عليك ....
المهم يعني انتيكا مش عارف يبقي مشهور ازاي و فضل و لا قطة عايزة تبص عليه
ده حتي فكر يقلع ملط في ميدان التحرير بس خاف من الفضايح و فكر يخلي حد يغزه مطواة عشان يتهم تنظيم القاعدة بأنه ورا الحادث عشان عايزين يمنعوه من نشر المباديء التنويرية النورية اللي بيطرحها و بيقسمها طول النهار .
مرة كتب في أخر المقال أبجني تجدني بس مافيش حد رضي يأبجه و لما سأل ليه كدة اتقال له يا ابني إنت فيه منك كتير و بتوع الفتة كتير و خريجين المدرسة السبوبية التلفيقية ماليين البلد ...
الواد انتيكا عنده إكتئاب مزمن من الموضوع ده نفسه يبيع نفسه بس مش لاقي حد يشتري
ده حتي راح لوديع عشان يشغله عند تهامي باشا بص له و قال له يخرب بيت أمك يا انتيكا :انتيكا عربى ام الاجنبى
صحيح يخرب بيت أمك يا انتيكا على أم البو لو تيكا اللي خلت عقلك شيكابيكا
----------------------------------------------------
ليست هناك تعليقات:
إرسال تعليق