تعريفات

أنا


ملاك طبعاً



إنت

شيطان أكيد



احنا

قلنا ملايكة و بجناحات



التانيين

ما قلنا شياطين و بديول كمان



الإسلام

أعدل قضية في ايد أسوأ محامين لو الشيخ الغزالي عاش كان غير المقولة إلى أعدل قضية في ايد أغبي محامين ....



فلسطين

واحدة جارتنا تم اغتصابها



الفلسطينين

ولاد جارتنا المغتصبة



إسرائيل

المغتصب اللي بيطلع لسانه للكل و الكل عايز يصاحبه عشان أصيع واحد في المنطقة



الجمهورية

هي مدرسة الملوخية بالتقلية الصحفية



ممتاز القط

إلعب يا فار



اسامة سرايا

نفسي يروح السرايا عشان يرتاح و يريحنا



تامر هجرس

هايعمل برنامج في رمضان و هايخد مليون جنيه ...أول مرة أعرف إن الرخامة بقت غالية كدة و بتجيب فلوس ....



أحمد عيد

نفسي أعرف بأمارة إيه مصر يبقي كوميديان....



المجالس القومية

مش عارف بتعمل إيه و لا مين جالس فيها و لا إيه لزمتها أصلاً



التوريث

محمود ياسين ......ولاده الاتنين ممثلين

عادل إمام .........عنده واحد مخرج و واحد ممثل

إلهام شاهين .....أخوها لازم يمثل معاها عشان محرم

صلاح السعدني ....ابنه أطول ممثل في مصر

نور الشريف ......بنته بتمثل برضه

سمير غانم .....بنته بتغني و بتمثل

إسماعيل عبد الحافظ... ابنه أرذل ممثل في العالم

و غيرهم كتير كتير و كل ما يطلعوا يقولوا إنه تم اختيارهم عشان موهبتهم ...ياتري ده بيفكركم بحاجة ؟



المسيرة

طول عمري أسمع عنها و مش عارف سايرة لفين ؟



المنعطف التاريخي

منعطف داخلين فيه بكل سرعتنا و شكلنا هانخيش زي ماخيشنا قبل كدة



عنق الزجاجة

مش عارفين نخرج منه إلا لو دهنا نفسنا فازلين أو ييجي بلطجي يكسر الزجاجة عشان نرتاح



الجلاد

هو اللي بيشنق الخايبين اللي إتمسكوا و بيسيب الخايبين اللي ما إتمسكوش



كفاية و نكمل بعدين