شوية كلام


(١) موقف


بابا احنا اتفقنا مع ماما كلنا اننا نجيب كلب بس عايزين موافقة حضرتك

كلب ؟ لا مش ممكن ....أنا مش موافق أبداً علي الموضوع ده نهائي

صب كاس ويسكي من إزازة الشيفاس و كمل ...انتم مش عارفين إن الكلب ده نجس ؟ دي الملايكة ما تدخلش البيت لو فيه كلب !!!!!!!!!!

(موقف حصل في بيت أصحابي و احنا صغيرين )



(٢ ) صبي و اتنين معلمين

صبي بيشتغل عند معلم و بعدين حس إن المعلم بتاعه مش بيدفع له كويس ....اتخانق معاه و فضحه فضيحة كبيرة و راح لمعلم تاني إشتغل عنده بس برضه اتخانق معاه عشان الفلوس ....حاول يرجع لمعلمه الأولاني اللي إشترط عليه يلحس البلاط و يبوس الجزم و بعد ما عمل المطلوب ....المعلم إدي له علي قفاه.....

الصبي كان لازم يفهم إنه باع نفسه ببلاش و إن زيه كتير ..............



(٣ )الأم المثالية

الإعلام إختار فيفي عبده الأم المثالية ....المرحلة الجاية هايكون تكريم سعد الصغير كبطل لحرب اكتوبر و إحتمال ياخد نجمة سينا !!!!!!



(٤ ).... ....

صبري عليك طال و إحتار فيك أمري ......



(٥ ) الوهم

السينما تعبر عن الواقع ....طبعاً ده كذب هستيري لا كلنا عايشين في العشوائيات و لا في فلل فيها حمامات سباحة ....بطلوا نصب بقي ....



(٦ ) أبو الليف

شاب مصري شبهنا خريج الكونسرفتوار و احلامه اتكسرت و إتداست تحت جزم مجتمع ما بيرحمش ...صوته رائع و صعب عليا جداً لما شفت اللقاء بتاعه لكن حزنت أكتر إنه اجبر إنه يتنازل عن إسمه و يسيب الناس تستغله و كل ده عشان يعيش ....أنا ما قدرش ألومه علي اللي عمله ....هو ده مجتمعنا بكل قبح.....



(٧ ) علاقة

البنت عجباني جداً و طلعت مزه جامدة أوي بس بصراحة أنا مش عايز أعمل حاجة تغضب ربنا

- يا ابني ورقة عرفي و كل شيء يبقي تمام و حلال كمان

- ربنا يكرمك و الله ما عارف من غيرك كنت عملت إيه !!!!!!!!!!!!!!!

( حوار حقيقي أوي خالص )



(٨)سرقة

لما واحد يسرق يدخل السجن وش و لما راجل أعمال يسرق مليار و يهرب يتفاوضوا معاه إنه يرجع الفلوس و يا دار ما دخلك شر و عجبي عليكي يا بلد ......



(٩ ) ادباء و موهوبين

لاحظت إن كتير صحابي الأطباء أدباء و موهوبين جداً و عرفت إن الثانوية العامة و مكتب التنسيق بتقتل المواهب في بلدنا ....يعني اللي بيرسم كويس يدخل حقوق و اللي ما يعرفش يرسم يدخل فنون جميلة و اللي موهوب أدبياً يروح الطب و اللي ما عندوش موهبة يروح اداب.....وكسة كبيرة جداً و قال عايزين نتقدم يا أخي ... (كلمة أبيحة )



(١٠ ) ضحك مؤلم جداً

أكتر اتنين بيضحكوني حتي البكاء و ضحكهم مؤلم

عم فتحي سليمان و سامح سمير



عم فتحي سليمان حبيبي و من أروع الناس و شاعر و ده بيت شعر جامد جداً



السنط يطرح بلح و أنا نخلي واجف ليه ؟

إبن الغازية فلح و انا حظي مايل ليه ؟

- و الله يا عم فتحي إبن الغازية لازم يفلح لأنها الغازية بتجيب فلوس و الغازية اللي هي أمه طلعت الأم المثالية ....عرفت ليه بقي ؟



سامح سمير إكتشاف رائع جداً و موهبة فظيعة و ده جزء من كلامه

- وجهة النظر السياسية كلنا سوسن

- الدين الدين لله و الوطن لسوسن

- أنا أحب مصر و مصر تحبني ....أنا اركب العجلة و مصر تزقني ....

و كتير كتير تاني ....



- و أحب أقول له شعار المرحلة الله - الوطن - سوسن



- محمد و عمر

الاتنين موهوبين جداً في الكتابة بس عندهم خجل يغيظ و يفرس جداً ....أرجوكم اكتبوا زهقتوني بجد ......



(١١ ) فضائيات

القنوات المصرية الحكومية فاشلة فاشلة و بدرجة إمتياز من يومين فيه وفد من جمهورية ايرلندا بيزور مصر و مذيعة الأخبار مصرة انهم وزراء من ايرلندا الشمالية و ده يبين إن قطاع الأخبار كفتة أخر حاجة و مش مفرقين بين جمهورية ايرلندا و ايرلندا الشمالية اللي تحت الحكم البريطاني و بكده الناس دي لازم تتحاكم بتهمة الغباء الإعلامي .....



(١٢ )حاذف و محذوف

اعترف اني حذفت حوالي ٨ أشخاص أو يمكن ١٠ في مدة سنتين

٢ مشبوهين

١ إسلامي متطرف

٢ ملحدين متطرفين

و ١ حزب وطني

و الباقي مجموعة عاهات مشابهة .....

اللي حذفوني ما عدتهمش الصراحة .....

و الفيس بوك كمان بيهيس و بيحذف ناس لوحده مجاناً كدة ....



(١٣ ) الحكومة

يحرق تيت و يلعن تيت ...ده انتم المفروض يطلع تيت ....لأخر كل تيت في الدنيا و في قاموس التيت و خارجه ....



(١٤ ) أسف

أسف لو كنت زعلت حد أو إتعصبت علي حد الفترة اللي فاتت لأني بجد كنت مجهد عصبياً و فكرياً و جسمانياً و أي حد زعلني أنا مسامحه بجد ( يستثني من ذلك الأغبياء و التافهين و العبط و اللي سايقينها)

هناك تعليقان (2):

  1. U r the best writer ever
    go on brother, best future for u

    ردحذف
  2. Thanks my dear sister, i will make my best

    ردحذف