مجتمع زي الرصيف وسخ و عايز يتكنس فيه ناس بتعرق علي الرغيف و ناس بتعرق من التنس ....حقيقة واضحة زي الشمس لكل الناس ....بس احنا عميان رافضين نفتح عنينا و نشوف البلوة اللي احنا فيها ....لأننا أكبر معوق للتغيير ....ايوان احنا مش حد تاني ...
هو فين في العالم تطلع رخصة سواقة و إنت قاعد في بيتكم و فين في الدنيا تعمل مصيبة و تطلع زي الشعرة من العجين عشان عندك واسطة أو عشان تقدر تدفع رشوة و تدلعها و تسميها اكرامية ....الإجابة ما فيش
و ناس تتعب و لا تكسبش و ناس تكسب و لا تتعبش ....سلو بلدنا كدة ....مش مهم أي حاجة المهم الفلوس ....و معاك قرش تساوي قرش و معاكش متساويش...تسرق بقي ...تنهب و لا يهمك انشالله تتاجر في المخدرات كل ده عادي المهم تجيب عربية و فيلا في الساحل و ربنا رب قلوب يعني ماتخافش.....اعمل اللي إنت عاوزه و روح حج و عمرة و هاترجع أبيض زي الفل .....غسيل و مكواة .....و إدبح لك كام عجل عشان الناس تدعي لك و كدة تضمن كل حاجة .....الفلوس و الجنة و دعوات الناس فوق البيعة ....أوكازيون بقي
و يقولك اننا أكتر شعب متدين ....مش عارف بإمارة إيه ؟ منافقين و كدابين و فاسدين و حشاشين و نحلل الحرام و نحرم الحلال و كله ماشي .....نقعد نقول شفت المسلمين كانوا ٣٠٠ في غزوة بدر بس انتصروا علي ألف من قريش منتهي الشجاعة و الأقدام ....و اديها كلام بس نيجي للفعل كل شيء يتقلب ....و إذهب إنت و ربك فقاتلا إن هنا لقاعدون ....و نطلع بقي في كلام زي ده زمن و ده زمن و ما يقدر علي القدرة إلا ربنا ....ما هو كل شيء له مخرج عندنا و له صرفة و تبرير كمان .....
و أصل الظرف السياسي غير موائم و أصل الظرف الإجتماعي لا يسمح و أصل الظرف البريدي لسة ماجاش ....كله بإسم الظرف من أول التاريخي لحد البتنجاني .....يا مظروفين بالقوي يا احنا ....
متعلم ...طز ....مثقف ...طزين....موهوب طيب تلات طزات ....بتكتب كويس و إيه يعني ...في بلدنا مش مهم ترسم كويس المهم تلون كويس ...و تلبس كل يوم قناع ....٣٦٥ قناع في السنة و الشاطر بقي اللي يكون عنده أقنعة أكتر ....
وولاد الحرام ما خلوش لولاد الحلال حاجة .....بيموتني المثل ده ....المفروض إن ولاد الحرام ما خلوش لولاد الحرام التانيين أي حاجة ...ما هم الاتنين واحد في الأخر ....تتغير الوجوه و الوساخة هي هي ما تتغيرش .....
و يقولك نخبة ...سلامات يا ست نخبة ....دول مش نخبة دول نكبة ....النخبة دورها تثقف الناس و هي قاعدة في التكييف و مش دورها تنزل الشارع تتضرب ....صح يا عباقرة ...أصل الضرب و البهدلة ده من نصيب ولاد الجارية ....هم يتضربوا و يتبهدلوا و انتم تركبوا و تدلدلوا رجليكم ...عادي يعني ....ما هم ولاد الجارية مكتوب عليهم يغرقوا و يتحرقوا....عشان مناضلين العوامات و محاربي الكباريهات ياكلوها والعة و يستلموها بيضة مقشرة و لا عزاء لولاد الجارية كالعادة .....
بقينا عايشين في كلام ....صاحيين في كلام و نايمين في كلام علي رأي محمد أبو سويلم .....نخليها إشتراكية ...لأ لأ ...ليبرالية أحسن ...لأ اوعي تقول كدة ...علمانية أشيك ....اه يا كافر ...لأ بقي لا شرقية و لا غربية إسلامية .....امشي يا إرهابي ....عمالين ندور و نتخانق و مقطعين بعض علي لون القطة اللي تاكل الفار و الفار مبسوط و سارح يخرب في البيت و ياكل الغيط .....خلوا القطة اسمها حنفي بس خلوها تاكل الفار ...بس ازاي هو احنا فاضيين للكلام ده ؟ ....احنا فاضيين بس للكلام الفارغ و قلة الأدب و الصوت العالي .....
انا شايف إن الإنسان أصله قرد كلام مش مظبوط ...الأصح إن القرد أصله إنسان و الحمار كمان أصله انسان و ده مش بتطور لا ده بالإختيار .....انسان إختار إنه يتشقلب و يتشقلط و يهز وسطه عشان أسياده ترميله شوية سوداني ....و يلا يا ميمون ....عجين الفلاحة شوية و نوم العازب شويتن .....و الرزق يحب الخفية و أعمل إيه يا بيه أكل العيش مر !!!!!!!!!!!
و التاني إختار يبقي حمار الناس تركبه و تدلدل رجليها و يشتغل عشان شوية برسيم لا يغنوا و لا يسمنوا من جوع .....و يقولك الحمدلله احنا أحسن من غيرنا و نصيبنا أكيد في الأخرة ....لا يا حمار منك له ما فيش قرد و لا حمار هايدخل الجنة ...لأنها اتعملت للإنسان و بس مش للحمير و القرود......
و اديني في الهايف و أنا أحبك يا ننس .....و أي كلام يا عبد السلام ....و ألف من يمأماء وراك .....عادي برضه .....تبقي محترم تاخد علي دماغك و أحسن لك تسيب البلد و تمشي و الباب فوت ٧ مليون و يفوت أكتر .....تلتزم بالفساد أحبك و أعصرك أنزل منك فاسدين صغيرين ......صوتك حلو تغني في الحمام .....تقلب أبو الليف تتشهر ....هي كدة و اللي يقولي غير كدة أحط صوابعي في عنيه ....
و يعمل لك حكومة ظل و برضه من غير رأينا لأن الاتنين شايفين اننا أولاد الجارية أو حمير هم يختاروا اللي هم عاوزينه و احنا بقي نولع بجاز .....و يطلع أحمد زي الحاج أحمد ما فيش فرق .....و موت يا شعب ....و ضحي يا شعب عشان واحد يقوم من علي الكرسي و ييجي واحد تاني و شلته مكانه و إنت زي ما إنت .....
و خد عندك الشعب لازم يعمل و الشعب لازم يسوي .....أصل الشعب نايم ....و ما حدش عايز يقول نايم ليه ؟......مش عارفين إنه نايم من الجوع و السرطان و إلتهاب الكبد و الفقر و العشوائيات و البلهارسيا ....كل ده مش مهم .....المهم اننا نقعد علي الكرسي و ناخد نصيبنا من الفتة.....و اديها توقيعات و اديها اعتقالات و اديها ترحيلات و الكل مبسوط و الكل منتعش ....عايز تعمل سعد زغلول ...ماشي إنزل بقي للناس و إدفع التمن ....مش الناس تدفع التمن و إنت قاعد علي تيتك تتفرج عليهم ......
و كله حرام من أول عيد الأم لحد شم النسيم ... حتي اللي ينتخب البرادعي يبقي بيحارب الله و رسوله .....لكن اللي بيقتل و ينهب و يسرق ما بيحاربش الله و رسوله .....زي الحجاب أهم حاجة تغطي شعرك و تعري أي حتة تانية .....مش مهم احنا يهمنا الشكل ما يهمناش الموضوع .....تهتم بالشكل نحبك ....تهتم بالموضوع تتنفخ ......و بمالك اعمل ما بدا لك و اعمل كل اللي إنت عايزه بس برة بيتي لأن البيت ده طاهر و هايفضل طاهر و يا إم المطاهر رشي الملح سبع مرات ....
هو ده احنا و ده مجتمعنا و في الأخر أنا أحرق دمي ليه إياكش تولع بجاز
ليست هناك تعليقات:
إرسال تعليق