(١)
طائفيات
- قالي تعرف إن محمود عبد الحي صاحبك طلع علماني ؟
- رديت ....ياراجل ؟ سبحان الله و أنا اللي كنت فاكره ألماني ....
- قالي تعرف إن مصطفي النجار اخوان ؟
-رديت ...لأ ما عرفش ...بس هو لو حتي كان اخوان بوذيين ....أنا باحبه و باحترمه...و بعدين لو الإخوان كلهم زيه كانت بقت حاجة جميلة أوي
- قالي إنت حر ...أنا حبيت أقول لك عشان أنا عارف انك مش بتحب الإخوان ...
- شكراً يا سيدي
- قالي تعرف انهم بيقولوا إن عبد الرحمن يوسف شيعي ؟
- رديت ..حتي لو طلع شيوعي أو كان إسمه عبد المسيح يوسف ما فيش حاجة ممكن تغير رأي فيه ....هافضل احب شعره و احترمه ....
اهمد بقي
(٢) البطاقة
- قالي تعرف أنا مش موافق انهم يشيلوا خانة الديانة من البطاقة عشان أنا بفتخر بإسلامي
- رديت بس البطاقة بتبقي في جيبك و ما حدش بيشوفها ...ممكن تعلق ورقة علي صدرك ...
قالي لا يا عم الناس هاتقول عليا مجنون ...
قلتله ...فعلاً ربنا يكملك بعقلك
- قالي تعرف إن خانة الديانة مهمة عشان لما ظابط يوقفك لازم يبقي عارف كل حاجة عنك ...
رديت ..يا سلام هو مش المفروض الظابط يوقفك عشان عملت حاجة غلط بصرف النظر عن ديانتك ؟
قالي أنت علماني و عايز تغير شرع الله .....
رديت مع السلامة و القلب داعيلك .....
(٣) متناقضات
- قالي تعرف إن يوسف زيدان بيثير الفتنة ؟
رديت ..لازم تقف مع حرية التعبير زي ما دافعت عن القمني
- قالي لأ الوضع مختلف القمني مسلم بينقد الفكر الإسلامي لكن يوسف زيدان مسلم بينقد الفكر المسيحي و كدة تبقي فتنة ....
رديت في سري ....يظهر إن لسة قدامنا كتير ......
- قالي تعرف إن القمني لا يحمل دكتوراه ؟
رديت ...اه ...عرفت
قالي ...مش مهم بس هو مفكر كبير
- قالي تعرف إن صفوت حجازي كمان لا يحمل دكتوراه ؟
رديت ...اه عرفت دي كمان
قالي ...ده المفروض يدخل السجن عشان الحركة دي
رديت ما هو زي القمني و فيه ناس هاتقول مش مهم هو داعية كبير
-قالي لأ دي مش زي دي القمني مفكر كبير لكن التاني داعية إسلامي ..يظهر انك طلعت مش ليبرالي ....
قلتله يمكن ...ربنا يسهل و اتعالج .....
- قالي إن معجب بالنظام الإيراني جداً ؟
- رديت ...ازاي تعجب بنظام عنصري مذهبي إستئصالي ؟ بيحتل أراضي عربية و بيعمل تطهير عرقي للسنة و الأكراد و العرب في الأهواز المحتلة ؟
قالي ...لا مش مهم كل ده ....المهم المنتوج النهائي .....
- رديت في سري يظهر إن إسرائيل علي حق هي كمان ....
- قالي تعرف اننا لازم نساند إنتفاضة الحرية في إيران
- رديت ...طبعاً لازم نساند الحرية في كل مكان
- قالي ...بس مصر وضعها مختلف احنا لازم نتحكم بالحديد و النار عشان البلد ما تضيعش.....
- سعد زغلول كان عنده حق ....ما فيش فايده...
(٤ ) تطبيع
- قالي تعرف أنا مستغرب من موقفك من إسرائيل المفروض انك كمستنير تؤيد التطبيع مع إسرائيل
- رديت تغور الإستنارة في ستين داهية لو كان معناها التطبيع
- قالي شفت ازاي انك متعصب ؟
- قلتله اديك عرفت يا عم الناصح .....
(٥) حرية التعبير و الرأي
- قالي تعرف إن الصحفية المستنيرة طلعت عميلة أمن ؟
- رديت ...هي لما ترفض الحجاب تبقي مستنيرة و لما تهاجم الملحدين تبقي عميلة أمن ؟
- قالي تعرف انها عايزة شهرة و بس ؟
- رديت ...يا عم إنت دي بتكتب في ٤ جرايد و بتطلع في التليفزيون علي طول ...شهرة إيه بقي و بعدين ما إنت عملت كدة قبل كدة و لا هو حلال عليك و حرام علي الناس ؟
-قالي لأ أصل أنا كنت عايز إنتقم منهم و أوريهم أنا أقدر أعمل إيه .....
- ما عرفتش أرد....
- قالي تعرف إن اللي عملته الاستاذة الصحفية ده ضد حرية الرأي ؟
- قلتله ...ليه ؟ هو سب الدين للناس و و وصف المحجبات و المنتقبات بأنهم زبالات و أكياس زبالة بثقبين مش جريمة كراهية هو حد يقدر يقول لواحد اسود يا زنجي و للاتيني يا سبك؟ ده يدخل السجن عدل بتهمة العنصرية و إحتقار فئة من المجتمع علي أساس عرقي و اللي بيحصل هو شتيمة فئة من المجتمع علي أساس ديني ....
- قالي أصل الموضوع مش كدة أنا هاقول لك كل حاجة في رسالة ...
-- و اديني لسة مستني
(٦ ) المنتخب
- قالي تعرف اني فرحان إن المنتخب القذر اتغلب من إنجلترا ...
- رديت ...ليه بس قذر ؟ عشان موضوع الساجدين ؟
- قالي لأ طبعاً إطلاقاً ....بس لازم تعرف إن ٨٠ ٪ من المسيحيين نفسهم المنتخب يتغلب ؟
عشان يوم حادثة نجع حمادي كانوا مسافرين و الرئيس إتصل بيهم و ما إتصلش بأهل الضحايا .....
رديت ...ما هو يوم ما غرقت العبارة راح الإستاد و ما راحش الغردقة ....
قالي ...أصل المنتخب ده بتاع جمال مبارك مش بتاع مصر
- رديت ...لو مصر حصلها حاجة هتحارب جنبي ؟
قالي ..طبعاً هحارب جنبك
قلت الحمد لله مصر لسة بخير .....
(٧ ) التوريث
- قالي تعرف انك بتكتب كويس و لو بقيت معانا في الحزب هاتبقي حاجة ممتازة ...ده لو جمال مسك مصر هاتبقي جنة ....
- رديت ....يا بني إنت عبيط و لا إيه ؟ امشي يا حيوان من هنا ....هههه
(٨ ) نصيحة
- قالي تعرف اننا لازم نحافظ علي علاقتنا بالناس عشان ماحدش يشتمنا أو يبتزنا ....
- رديت ....اللي في نفسه في حاجة يعملها ...أنا ما فيش علي راسي بطحة و اللي عايز يجرب يشوف و يستحمل بقي اللي يجرى ....
- قعدنا نضحك أنا و هو
(٩) عادل حمودة
- قالي تعرف أنا مابحبش الراجل ده خالص
- رديت ...تحبه أو تكرهه إنت حر ...بس الراجل مدرسة صحفية و بيحوز كل احترامي و تقديري و كفاية حربه ضد الفساد .....
(١٠) ناصريون
- قالي تعرف إن عبد الناصر كانت ايده نضيفة ؟
- رديت ..فادتنا بإيه نضافة ايده ...الظباط الأ شرار نهبوا البلد و نتيجة الإنتخابات ٩٩,٩ ٪ و معتقلات اعدامات و تعذيب و صرف فلوسنا علي العرب ده غير الهزايم ....
- قالي ...سيبك من ده كله تعرف إن خطة العبور هو اللي حطها ؟
- رديت ....بلا خيبة بقي هزيمة في ٥٦ و تنازل عن مضيق تيران و في ٦١ المشير رجع بالبيجاما من دمشق ده غير اليمن و الوكسة في ٦٧ هو يعني ما كنش قادر ينتصر و هو عايش و استني بعد ما مات ب ٣ سنين عشان ينتصر ؟
....ضحك و قالي علي فكرة أنا مش ناصري ههههههه
--------------------------------------------------------------------------------
الجميع مدعو للقراءة و التعليق
ملحوظة أنا ذكرت إسم محمود عبد الحي و مصطفي النجار و عبدالرحمن يوسف عشان عارف انهم مش هايزعلوا
- الكلام ده مش المقصود بيه إهانة أحد أو التقليل من رأيه أياً كان
- هو هدفه توضيح التناقض اللي أنا شايفه و بيعبر عن ارائي الخاصة و اللي جايز جداً تكون غلط ....و اتمني إن كلامي يوضع في الإطار ده
- أي انسان كلامي يكون زعله أنا باعتذر له مقدماً
- رديت ....يا بني إنت عبيط و لا إيه ؟ امشي يا حيوان من هنا ....هههه
ردحذفهههههههههههه الحوار ممتع جداااااااااااا
رائع يا استاذى :)
عبد الحميد
ردحذفالحوار ده تجميع لأحاديث مع ناس كتيرة ....ساعات مش بقدر أفهم التناقضات اللي جوانا و جوة الناس ....نفسي كل واحد يقعد مع نفسه و يحل الكلام ده مع نفسه عشان يرتاح و يريح نفسه و اللي حواليه ....
...بصراحة الحوار كان حلو و بيجنن لازم يفهموه كل الناس وكمان لازم الكل يقراه بتمنالك التوفيق مع احلى سلام
ردحذف